AGAMES 討論區

標題: 《童話輕小說》－貝碧遊記 [打印本頁]

作者: 貝碧托夫 時間: 2013-4-3 19:26:17 標題: 《童話輕小說》－貝碧遊記

本帖最後由貝碧托夫於 2013-4-3 22:43 編輯

伺服器：月費版
角色名稱：皇甫朝雲

姓名：貝碧
年齡：１８
地址：貝伯港碧海藍天花園 12號
教育程度:
吉恩村學校幻獸師證書
工作經驗:大量捕捉黑羊

裝備商:點解你會黎見依份工呢?
我:唔好問點解啦

裝備商:你黎見工仲咁串？！！
　　我:我知你等人用既，成條街又唔係得你一個賣裝備！

裝備商:你好野！月薪二千可因，一日十二個鐘
　　我:１２個鐘！番一日都暈低啦

裝備商:你唔好同我講咁多野，依家隔離海港搞緊罷工，好快好多人冇野做黎同你搶架啦！得就聽日番啦下
　　我:好好好．．．

大家好！我叫貝碧，我曾經既夢想同好多人一樣，係做一個偉大既冒險家，好可惜我老豆唔係村長，亦唔係咩富商，根本冇能力出去冒險，就好人地隔離屋個明仔，佢老豆就係賣傳送粉起家，佢資質低低地，但係有錢讀個速成高級劍士課程，疏通下ｄ國家官員
，就得到國家既認可證，可以隨處冒險！

冇錯，係我地人類既王國，冒險當然要得到各關卡既通行證先可以通行，而且有一定既學歷先可以

第二日
　我：埋黎睇埋黎簡！！我地賣既都係上等既裝備！
客人：把劍點賣呀？

　我：先生，你真係識貨，依把劍係我地全港最尖利既劍，任何野都可以穿破！
客人：有冇咁堅呀，就依把啦！

　我：咁不如就買埋依個盾啦，佢堅固既程度，咩野都可以擋得住
客人：下，咁我用把劍吉囉去，咁又會點呢

　我：唔．．．你買左自己試下啦不如，兩件裝備多謝你一萬可因
客人：我冇咁多錢起身...

　我：用埋你身上粒封印石換點睇？
客人：你對佢有興趣？

　我心諗（依粒正野呀！！！封印石既分法就係睇佢既色彩，依粒黎講應該都值３０萬可因）

　我：我廢事你行黎行去麻，依粒青ｂｂ咁，囉去賣都值５０００可因掛
客人：好！！我留黎都冇用！

說時遲那時快，我已經同左老闆辭職，我帶上粒稀有封印石，決定去展開我既冒險！

我一個人去到吉恩村買番ｄ補給品上路，我既目的地！矮人王國金銀城，果到有最大既市集，我粒封印石一定可以賣到好價錢
等我去留言版留番我個大名先，依！單新聞．．．

吉恩動新聞
貝伯港兩名戰士試裝備，誤斬好友，裝備商被捕

我：嘩，走遲半步都死真係．．．．

作者: 貝碧托夫 時間: 2013-4-3 20:27:31

本帖最後由貝碧托夫於 2013-4-3 22:42 編輯

經過南綠野同害怕峽谷，雖然有好多兇惡幻獸，但係只要你唔搞佢，經過由國家指定既道路係非常之安全
黎到伊利村，其實已經係地下既世界，裹邊非常之黑，完全係生活唔到人真係

衛兵長：喂，細路唔好亂講野！我地矮人族係全世界最勇猛既民族，開片上黎你叫救命都冇用
　　我：我貝伯港碧爺，成個海港都我睇既，打水怪當食生菜架咋，好心兵大哥你講野果時就向上望啦，唔係我真係睇你唔到架

衛兵長：咁串？看我閃電斬
我向右一翻，立即避開佢既快刀，然後使出我既本領裝死
　
衛兵長：有冇咁化學呀！搞出人命添
衛兵長：阿ａ阿ｂ，依到有人被幻獸襲擊受傷，送佢去金銀城醫院
ａｂ士兵：係既長官！！！

ａ：伊利村有幻獸既咩
ｂ：冇架
ａ：咁阿頭話佢比幻獸襲擊既
ｂ：話之佢比恐怖份子襲擊，阿頭話咩野味咩野囉！

～～～～～～～～～～～～～～～～～～～～～～
護士：你好，你岩岩係伊利村暈左！所以比人送左黎全世界人流最高既金銀城醫院
　我：呀．．唔該你，幫我減輕唔少腳力

護士：你講咩話？
　我：冇...我話唔該你幫我減輕唔少痛楚．．．

老老實實，伊利村同金銀城有唔少兇惡既幻獸，以前就有唔少想去金銀城市集既年青人受襲，死傷人數不少

嘩終於黎到金銀城既市集，真係好多人，好多靚女

商人Ａ：平賣８００ｍｐ藥！！
商人Ｂ：收各類珍品！！
商人ｃ：賣地下最強卡拉龍，只要黃金不要可因

　民眾：嘩嘩嘩！傳說中既王者幻獸
卡拉龍：望咩望呀

　民眾：識講野添呀隻幻獸
卡拉龍：大驚小怪

竟然比我見到卡拉龍，真係不枉此行
我：老細！黃金我就冇啦，我用粒稀有既封印石同你換啦

商人ｃ：粒爛鬼石，值得幾多錢，都唔夠ｄ金價升得快掛？
　　我：說話就唔係咁講，依粒稀有既封印石可以捉更高級既幻獸，而且同寵物精靈卡通故事書既必捉球一樣，一封即得

商人ｃ（咁堅，睇黎佢都唔似吹水，還掂有傻仔上檔）：好！就我同你換
　　我（咁都有傻仔上檔，今次成個貝伯港既裝備街都可以買落，然後再狂加ｄ人租，勁過綠夫村既領匯！！）

就係咁，我就帶住卡龍拉離開金銀城，回去貝伯港既路途

金銀城幻獸店內
商人ｃ：請問依粒稀有既封印石值幾錢呢？
幻獸師：下.....依粒玻璃黎架咋，邊係封印石呀.....

商人ｃ：！！！我竟然比條友呃左

害怕峽谷下
卡拉龍：好熱呀！！唔好行住得唔得呀
　　我：唔得，我要囉你黎晒命直到返到去貝伯港呀

卡拉龍：我唔撈啦！！！
此時卡拉龍慢慢將自己個頭除下來，然後露出一個人頭

　　我：咩話！！人扮既
卡拉龍：我收左個商人５００可因叫我扮，佢話要到南綠野先可以除低個頭套，但我頂唔順真係．．．
　　我：下，唔係掛，明明隔離好多人係到，冇可能冇人發現唔到係假架？
卡拉龍：果ｄ　ｍｋ矮人下嘩，收左人一百可因做馬架咋，就同你地選村長ｄ人比錢做馬差唔多咁啦

之後，我就番去貝伯港做番一個普通既市民．．．．

完～～

　　

作者: lovernami 時間: 2013-4-3 21:34:34

正！笑了

作者: 巴神 時間: 2013-4-3 22:54:24

笑

作者: jelly 時間: 2013-4-4 01:40:01

充滿驚喜呀!

作者: 巴神 時間: 2013-4-5 09:24:49

作者: 百力之 時間: 2013-4-5 16:01:04

樓主好野

作者: aes090 時間: 2013-4-24 21:40:13

作者: 貝碧托夫 時間: 2013-5-1 22:25:46

簡我啦簡我啦

作者: 貝碧托夫 時間: 2013-5-2 19:47:55

最後一推

歡迎光臨 AGAMES 討論區 (http://061244113049.ctinets.com/)