～＊開缸全紀錄+感想＊～ (不定期更新)

lamxdxd

無聊冇野做加上想養蝦仔,所以廢物利用,拎個8吋方缸養...
呢個帖主要係想紀錄一下開缸過程同比大家參考一下

2009年3月15     DAY 1
今日出左魚街買開蝦缸所需既物品同工具,今日所需既工具有......

1. 8吋方缸+5W PL光管(即套缸) × 1個      $ ? (圖1,2)	8. AA硝化細菌 × 1枝                        $32 (圖4)
2. 蝦泥 × 1包                                         $38	9. CYBER AQUA掛濾 × 1個              $30 (圖1)
3. HAGEN PH指示劑(PH4.5-9.5) × 1盒    $32 (圖3)	10. 加厚白棉 × 3包                           $10 (圖4)
4. HAGEN NO2指示劑 × 1盒                   $48 (圖3)	11. AA生物環 × 1包                          $68 (圖4)
5. HAGEN NO3指示劑 × 1盒                   $58 (圖3)	12. 溫度計 × 1枝                              $10 (圖1)
6. TROPICAL蝦糧 × 1樽                         $62 (圖4)	13. 除氯劑 × 1枝                              $ ?
7. 隔離網(細) × 1個                                $15 (圖4,5)

而水草只有

1. 三角莫絲(已紮石) × 1個      $28 (圖6)

2. 不知名莫絲橋 × 1個      $28 (圖7)

物品+水草相片,由於相機+燈光問題,有D相唔係好清,請見諒

1. 8吋方缸+5W PL光管+CYBER AQUA掛濾                 2. 熄燈時棧藍色LED燈會著


3. HAGEN PH,NO2,NO3指示劑                                      4. 蝦糧,隔離網,生物環,白棉,硝化細菌


5. 隔離網,要自己砌的,如果養魚B,建議用再密D既網     6. 三角莫絲


7. 不知名莫絲橋,估計係爪哇莫絲


P.S想知D物品係邊買請PM我,內容請寫明想問邊樣野係邊度買,生物環同白棉我唔係咁記得,所以答唔到
===========================================================================
講完所需物品同價錢,係時候講開缸程序
買蝦泥果位呀姐教落,蝦泥要洗洗佢先好放落缸...雖然養份會流失,但遲早都會翻缸,所以洗下冇壞:)
洗呀洗......由下午5點左右洗到去6點,再抹下個缸既玻璃,約6點半終於落得泥
之後執好放缸個位附近既物品,7點先至放得缸,落得水..但因為我好暴力咁炒起D泥既關係,成缸水比我搞到超黃!!再放溫度計,令人無奈的是...個吸盤係廢的!!吸左冇耐,支溫度計已墜落,插入泥底,
所以買溫度計果陣一定要睇下個吸盤掂唔掂,否則會好似我咁,成日伸隻手落缸整返好支溫度計

SET好掛濾之後,最「重要」既一刻(即亮燈儀式)開始,不過當時手濕,影唔到相,請見諒,
而且個缸其實都用過一段時間,所以...冇咩好睇!

由於我冇加除氯劑既關係,硝化細菌要係DAY 2先至落,以免氯氣殺死硝化細菌~

P.S藍色字即係舊缸用開,價錢粉紅色既即代表大約既價錢

[ 本帖最後由 lamxdxd 於 2009-3-17 23:10 編輯 ]

lamxdxd

DAY 1晚上落左幾粒蝦糧,第2朝起身竟然1粒蝦糧都冇:funk: ,真神奇!!
相信大家都會問點解到依加都仲未提起D蝦仔..依加就講啦

由於8吋缸仔未建立好硝化系統,所以要係大缸用個隔離網裝住黎養先
大缸PH 6.0,NO2: 0.1MG/L,NO3: 5MG/L
蝦仔最避忌既係PH震盪同水溫突變,所以養蝦,對水對溫係必做,就算係平價蝦都要對水對溫,否則好易死
我係其他壇學既做法係先對溫15至30分鐘,再打開個袋,倒走3份1水,再加返同樣份量既魚缸水,用衣夾夾住個袋,由得佢繼續浮,約15分鐘後,倒多3份1水,再加返3份1既魚缸水...之後用撈網撈蝦放入缸~

由於懶既關係,所以DAY 1冇上樓上舖,唯有在新大自然隔離間賣蝦既舖頭(地舖)買蝦仔,
今次買左1袋,有4種蝦,有虎紋蝦,藍蝦,蜜蜂蝦,日本珍珠蝦..合共40隻,買左$40,仲見到有蝦抱卵~
但可惜既係,對溫期間,見到有隻蜜蜂蝦死亡,可能係唔習慣水溫,因為我伸隻手落缸入面,都覺得D水好凍!
不過...DAY 2繼續發生死亡事件......死左1隻虎紋蝦:'(
完成對溫對水後,便用撈網放蝦仔落隔離網,因為我個缸多草,而且有對鯛,所以隔離設備係必需


餵魚時順便落左幾粒蝦糧,然後熄燈,向缸仔落硝化菌

報報缸仔情況先,水溫24度,水已經比DAY 1好小小,但出現白濁,要比耐性等硝化系統建立好~
又或者啤水都係一個好方法,不過嫌浪費+唔方便..

[ 本帖最後由 lamxdxd 於 2009-3-17 23:58 編輯 ]

lamxdxd

今日死左3隻蝦,心痛!!但死者以虎紋蝦同蜜蜂蝦為主,唔通係咁死依2種蝦,
就代表左虎紋同蜜蜂蝦較難適應水質,新環境...?都係問下D師兄先得

撈死屍時,發現有蝦仔脫出黎既舊殼,估計係為左適應水質/其他因素先至咁做,不過依3日以黎,我都見過幾次疑似蝦仔脫殼既動作,例如蝦身彎曲,好似蝦米......不過都唔敢肯定,再搵下資料先:)

今日終於忍唔住手,CHECK下新缸水質
水溫: 24 *C
PH: 6.0
NO2: 0 MG / L
NO3: 0 MG / L

1. PH顏色表+測試結果,唔知有冇睇錯,淡水睇A             2. NO2測試結果+顏色表,冇任何變化即係0


3. NO3測試結果+顏色表,淡水睇左邊個表


NO2同NO3都係0既原因我諗係因為冇任何生物,為左幫助硝化系統建立,
決定換3份1水,再加返同樣份量+冇氯氣既水,係大缸撈2條紫斑馬做死士,加多2.5ML硝化細菌
水既清澈度已經比前2日好,但仍然有白濁既情況...
記憶中,我大缸開缸後既1星期內,D水都係白色,能見度比依加缸仔更低,白濛濛一片,後來換左一半水,加多5ML硝化細菌,再等多1星期...D水終於清澈見底,當然,如果炒起泥底,水一樣會變返白濛濛一片
但大缸同細缸既分別係...生物環多N倍,底床又有POWER SAND SPECIAL (S),雖然屬於底肥,但成份已經包含清水粉同硝化細菌粉!!所以......大缸個硝化系統建立得咁快都係靠包POWER SAND SPECIAL:o
真係好後悔點解當初唔留返小小黑泥同POWER SAND SPECIAL比自己開蝦缸:bang:
算了吧...靠支菌水搵食,最多出去魚街買菌粉......

送多2張相比大家
1. 大缸D水,清到連舊莫絲石都影到,不過條鯛公太醜,大煞風景,失禮晒


2. 死士一隊加油,蝦仔既幸福靠晒你地啦


[ 本帖最後由 lamxdxd 於 2009-3-17 23:59 編輯 ]

lamxdxd

今日開始,標題新增蝦仔數目+心情......今日心情真係唔知好嬲定好笑定疑惑,還是悲哀......
想知點解,請繼續睇落去...閒話休題,去片!!

3月18      DAY 4
琴晚大缸整左支CO2,今朝7點幾都仲未見有氣出,於是加多小小糖同乾依士落樽,
6點幾返到,終於見到有氣出啦,證明左我已「成功」,不過懷疑落得唔夠糖,出氣出得十分慢,會考慮加多支/再整過支CO2


除左等左成半日先至出氣之外,令我覺得無奈+唔知好嬲定好笑既係......
今朝起身竟然見到個原本駁得超實既細化器甩左係缸底!!
ORZ...點解我D魚可以咁神...?水草插得深又拔到,細化器插得實又整得甩,唔通草缸真係冇望?還是鋼/鋁樽CO2已在遠處向我招手了...?

悲哀既係......今朝竟然死左5隻蝦!!!略略咁睇過,死者以細隻為主!!
睇黎買蝦真係唔可以選D細隻到乜咁既蝦,但袋裝蝦,冇得揀...唔通真係要去蝦仔專門店買蝦...?
算吧...樓上舖就樓上舖,聽埋養蝦心得都好...


繼續匯報缸仔情況~~
水質感覺上比之前果幾日好左,會再考慮換多幾次水      ↓有條類似樹枝既物體浮黎浮去,撈走佢先


溫度計再次倒下......                                                         蝦殼...睇黎今日都幾多蝦脫殼

lamxdxd

話咁快就到DAY 5,今日既心情只能以一個字去形容: 哀
想知點解咁哀?想知點解請繼續睇落去,閒話休題,去片!!


今朝起身煮杯麵食時,望下個大缸,見到有隻抱左卵既珍珠蝦死左,真悲哀,一屍N命......
可能係唔適應或者飽死,甚至係溶氧唔夠吧...不過熱死就真係冇乜可能,水溫25度都未夠,
唯有下次買蝦時對溫對水對耐D...隔幾日先餵一次同減糧,反正個網放左條莫絲橋,蜈蚣草..夠晒食......
甚至......買返個海利V10,聽聞夠晒靜,不過價錢先至係重點

放學返到屋企,又要撈蝦屍啦,今次好恐怖,死左2隻,其中1隻只得下半身!!


聽說我返緊學果陣,都死左1隻,
丟蝦屍時,發覺原來呀爺係廁所洗濾桶!!仲整爛左入水果條喉!!!!!!!!
ORZ..邊有人會咁:pig: ,開缸1個月都唔夠就洗濾桶...?
連硝化系統都未定得晒呀!!!就算係洗,都換左舊白棉算啦!
:bang: 呀!!我個硝化系統冇啦!!幸好底床仲未受影響,POWER SAND SPECIAL有硝化菌粉係度姐!!
睇黎又要洗錢買菌粉重新建立硝化系統啦!!當然係買BACTER BALL / BACTER 100 (2者成份1樣,只係前者係丸狀,後者係粉狀),雖然貴D,但對「ADA」呢隻牌子有信心MA- -

夜晚食完飯,走去餵魚,發覺有隻蝦比個網夾扁左,可惜救得遲,死埋......
唉...點解5日內就可以死咁多蝦?:'( 睇黎幾日後又要測下水質了......

最後匯報一下缸仔情況,今日發覺水面好多泡泡,唔知果D係氧氣還是污糟野
今日加左5ML硝化菌,落之前搖得特別勁,希望快D建立好個硝化系統,快D可以落蝦,
因為個網真係好細...連蝦都夾得死~
同埋見條三線母比條公追得太勁,條母驚條公追佢,所以連野都唔敢食,搞到超瘦
所以決定將條三線母放埋入缸仔,做蝦缸死士!!

白濁仍然持續,看來要買活性碳吸吸色...(或者買清水粉......)


[ 本帖最後由 lamxdxd 於 2009-3-20 00:01 編輯 ]

lamxdxd

今日心情簡直係火!!神早流流就死左1隻蝦,6點幾放學返到黎,又見到死多4隻蝦...
食完飯走去餵魚,又見到死左1隻蝦...唔火先至奇!!
係時候要諗下係乜原因搞成咁,不過問過人,大多數都係關長開CO2事:
CO2長開,加上植物(包括水草)只會在日間進行光合作用,夜晚會吸氧氣,放出CO2,令水中既溶氧量降低,加上有十幾條魚,以致蝦蝦死亡

就以上原因,即係氣泵已向我既方向走近,而錢......差唔多要飛走.....................................

自琴晚落多次硝化菌後,今日D水比琴日更清,希望4月落到蝦...


明天又出魚街買草買DIY CO2既物品,順便睇氣泵,岩價+要求就買

[ 本帖最後由 lamxdxd 於 2009-3-20 23:52 編輯 ]

challroo13212

要日本氣泵同埋D氣木,氣石

lamxdxd

今日出左魚街買野,戰利品有

藍蝦+櫻桃蝦 × 30隻                   $30	珠鱗 × 2條                             $20
ADA BACTER BALL × 1支         $65	火焰莫絲石 × 1件                   $28
膠氣喉 × 約3尺                          $3	小谷精 × 1棵                          $10
BOYU細化杯 × 1個                    $28	鹿角苔石 × 1件                       $48
珍珠鼠 × 1對                             $18

P.S價錢粉紅色即大約既價錢

今日死剩11隻舊蝦,加上蝦缸種草都要落CO2,所以決定順便買埋蝦仔,同樣去返上一次買蝦果間,
今次買左藍蝦同櫻桃蝦,加埋有30隻,不過D櫻桃蝦好似唔係好夠紅,應該慢慢養先會紅返,但都唔會有極火蝦果D咁超級紅

相信大家都好想知點解我會係標題度寫「蝦仔成員: 31+11」,其實「11」即係舊蝦成員,而「31」......
其實係因為剛才發現有蝦B係泥底,仲識游識郁,所以先寫成31隻!!睇黎掛濾個入水位都要買野包包佢先

今次對溫對水都對得耐左,前後都搞左成3個幾4個鐘先至落蝦..最好笑既係,竟然發覺自己冇買止流閥=-=
幸好有個氣閥,可以當止流閥咁洗,不過就一定有機會漏氣

報告一下缸仔情況先,因今日要放草,所以......缸水再一次變得超濁
對水中                                                                              濁到喊


支燈變成咁,估計就快報銷                                               溶得超快


估唔到蝦都食BACTER BALL...真識食                            第1次唔用止流閥整CO2


回7樓: 一定要日本氣泵=-=?我唯一既要求係靜同平=-=

[ 本帖最後由 lamxdxd 於 2009-3-22 16:20 編輯 ]

lamxdxd

呢幾日都唔得閒更新,更加唔得閒影相...所以只能用文字去回報缸仔情況

依幾日,水面一直都有D泡泡存在,估計係污糟野,睇黎要換水,不過冇水桶裝水......同時,支橙好似又暗左,要快D換燈先得,除左泡泡,仲有鹿角苔既葉碎,真係多得D蝦仔唔小- -

棵小谷精D葉黃黃地,唔知係死左定適應緊新水..今日更浮起左...ORZ
而之前放左落去既BACTER BALL,係幾日內比蝦仔食晒......真係放得多,食得多

大缸支CO2個止流閥比唔知邊個整爛左,搞到出唔到氣...睇黎又要出多次魚街了- -
不過係網入面D蝦仔完全冇死,超開心!!

lamxdxd

唔經唔覺開缸已經有2星期,水仍然未清,燈仍然未換,掛濾仍然咁多草塞住......

唔知係咪新蝦未整CO2既關係,死蝦數量大大減少..同時,舊蝦冇餵1星期都死唔去,所以今日放左3粒蝦糧,希望唔會飽死:Q

大缸D莫絲又唔知做乜鬼...D葉生晒D啡色野,要搵人幫我斷下症睇下D啡色野係乜黎



加左放大鏡影,但依然咁差...




[ 本帖最後由 lamxdxd 於 2009-3-29 22:52 編輯 ]

lamxdxd

今日又出左魚街買野,不過今次主要係買用具:L

日光燈 × ?條                     $10	迷你牛毛毯 × 1束           $38
紅班馬燈 × ?條                  $10	紙莎草 × 1袋(3棵)          $28
青道夫 × 4條                     $20	蒙脫石 × 1舊                 $15
刷(洗濾桶條喉的) × 1枝      $22	AA硝化細菌水 × 1枝      $32 (幫老豆買的)
止流閥 × 2個                     $12 / 個

唔知點解今日入水草店買野,感覺緊係好似怪怪地,平時去開都冇呢種感覺
可能係因為今日錯誤地穿左條窄到無論既灰色中長褲,加埋桃紅色既短袖衫+白色背心外套先至有咁既感覺
因為之前去魚街,唔係穿條有d拖地既深綠色褲就係吊吊地腳既杏色長褲加長袖衫+深啡色乾濕褸的..
不過我又真係超鍾意短袖衫+背心外套咁既配搭...:L
又或者...一係門口就同水草店個老闆望到實吧,其實都係無意中同佢有咁既眼神接觸...
希望唔會因為呢件事而令我以後都唔敢入水草店買野吧:Q

但係最終都在水草店買左粒蒙脫石同2個止流閥,仲有1袋紅班馬燈,1袋日光燈...
而草...真係揀唔落手,第1係有種好奇怪既感覺,第2就係星期日去魚街真係好多人,要揀草係1件難事
呀爺見到個ADA出水口仲話想買,成2百幾蚊個...不如留返D錢等日後翻缸/換濾桶好過啦

去完水草店,就過左對面既草逸店買草,唔知點解次次買草都會走去水草店混下吉先,再去草逸店買:L
但係係果度真係睇左咁耐草都唔會有D乜野奇怪既感覺..唔知係咪我連間既野老闆都唔知係邊個,點既樣,
有冇拎過ADA水草造景比賽冠軍...先至企,買,睇得咁安樂呢?
係果度睇左冇耐,終於買左1袋(束)迷你牛毛毯,1袋紙莎草(其實入面得3棵= =)..

返到屋企,第1時間打電話比老豆過黎分魚先,結果拎左幾條紅班馬燈,菌水,大缸中某D草既分支走...
其實我都唔想剪分支,不過缸得12吋高...同埋有D草墜晒係前面,唯有剪草...

插草時,發覺D泥唔夠厚,後面既位又窄到乜咁,決定將舊火焰莫絲同鹿角苔移向前先..
之後會發生既事當然係成缸水變到超濁..此時只有2個方法: 等,換水..但最後我都係選左前者
因為發覺自己愈插愈唔知自己想點...算了吧,舖得泥,種得草,總會有翻缸既一日
與其搞一個連泥都唔夠厚既缸仔,不如諗下大缸翻缸時種咩草仲好...

[ 本帖最後由 lamxdxd 於 2009-3-29 22:45 編輯 ]

lamxdxd

開缸已經19日...水既能見度仍然冇大缸咁正(清)
令我開始懷疑到底係D泥唔掂(太污糟)定硝化系統仲未穩定,還是一定要換水先清..
因為大缸既底床都係用ADA野...仲記得果陣D水1星期就已經超清:loveliness: ~養燈魚,種草一流
想換水,但個水桶放左D唔知灰定乜野,暈......唯有有機會就走去超市買支蒸餾水/用D汽水樽裝水吧

不過都係等大缸翻缸時偷D黑泥同火山粒順便幫蝦缸翻缸仲好了...
自從將餵糧次數減至逢星期5餵3-4粒蝦糧後,死蝦既情況大大改善,但間唔中都會死1隻蝦,可能係因為水質,水溫問題吧...因為我都成個星期冇測過NO2,NO3,PH值了

另外...大缸開始有青苔,2條所謂既「清道夫」完全做唔到野,1年到晚都只識得痴住塊玻璃,睇黎只有我先至係唯一可以清走青苔既生物
而條三線公...愈黎愈霸王,由原本既怕怕羞羞都變成成日游出黎趕魚:@ ~三線母就......仍然咁鍾意躲係水草入面
水草幾乎係亂生咁滯...不過唔理啦,返缸時先慢慢搞啦

蒙蒙地既就係青苔,相機好廢,影唔到咁近既野                亂生的紅松尾,12月一定要翻缸!



～特別煩惱報導～
話說今日我既戰友比左盒都未開過既「幸運小海星」比我,奇怪啦,又唔係我生日,佢又唔係爭我野,
無啦啦比盒小海星我做乜呢?吹左一輪,終於知原來佢係7仔買,但佢既母親大人唔比佢養,迫於無奈就比左我:L
不過......我養淡水野都仲係低手一個,要我養隻海星...真係高難度左D WO
放左學,返到屋企唔理咁多,洗下個玻璃樽再將包海沙仔放入去,再將個袋D鹹水+水草+海星倒落去
但係D水草都幾令我震驚,開頭見到個袋有D黃黃地色一條條既野以為係屎,點知原來係枯左既水草,數量頗多,所以倒水時要拎個細撈網放係個樽口,慢慢倒水落樽,再用手撈隻海星入去
開頭見隻星郁都唔郁,以為佢死左,點知沖完涼出黎,見到佢吸住D水草,終於鬆一口氣
同時亦將多左既鹹水用PH指示劑測PH,結果係8.0至8.5,不過NO2同NO3冇測,而且冇鹽度計,測唔到鹽度- -

但最煩既係,個樽咁細,真係有想換缸既衝動,只要一個超細小既缸仔就夠了
不過...呢隻幸運小海星可唔可以好似其他海星咁用化學鹽開出黎既鹹水,生物石/珊瑚石/海沙做底咁養呢...?
最弊係我完全唔知海星係食D乜野維生...又要搵高人幫忙了
希望唔會比呢粒星毒到開個鹹水缸吧- -..我見人地開個鹹缸都冇左成幾張金牛




[ 本帖最後由 lamxdxd 於 2009-4-2 18:09 編輯 ]

lamxdxd

今朝起身食早餐時,見到大細缸各有一隻蝦死亡,2缸水唔係真係咁難頂呀嗎?
結果......放學返到黎都仲見到2個缸既死屍,算了,自己清吧,反正現在草缸同蝦缸都係我打理
清完蝦屍後,望見個黃色小水桶加大缸中生到傻既水蘿蘭仲有冇乜氣既CO2,
就決定左剪左D生到會阻住光既水蘿蘭同換乾依士,不過D草真係.......生到打晒結,幾經辛苦先至剪左多出黎既水蘿蘭

剪完草,最重要既時刻終於到,就係插草!!因為蝦缸仲係只得1舊莫絲同鹿角苔,
依次唔用水草鉗,改用手插,因為個鉗真係好長,加上個缸上面仲有一層,隻手粗D/撈網長D都伸唔到入去
結果插晒迷你牛毛毯同紙莎草,今次我比較偏向平原景,不過都打算暑假/12月聖誕假翻晒2個缸,所以唔加草住
但我一定會記住,下次翻缸千其唔好落鹿角苔,否則清塞住入水位果D草碎都有排你清!!
插完草就換水了,因為冇水桶裝水既關係,就用左2個500ML既茶字典水樽留左D水先...
不過...個位真係窄到連杯都放唔入,唯有用大缸用開既虹吸管吸走3份1水吧,順便吸吸水面
最後,2支水夠晒3份1,之後落硝化菌......換水後,缸水都算幾清,不過仲係唔夠大缸咁正,唯有多換水

送上蝦缸近況~~




[ 本帖最後由 lamxdxd 於 2009-4-4 13:26 編輯 ]

lamxdxd

點解我會又驚喜又煩?不如講左好再講壞吧!!

今日一上AGAMES,見到「短消息」3個字閃下閃下,就按左入去睇
見到封PM叫「[系統消息] 你發表的主題被執行管理操作」,刪帖嗎?移帖嗎?關帖嗎?
通通都唔係,原來係依個主題被置頂!!成個人即時震一震,然後開心得落淚
講得太誇張了吧?的確,當時就係咁誇張,我冇理由要寫得平平淡淡咁去呃人嘛!!
驚喜的......就係咁樣黎左!!

而煩既就係,琴晚明明換左乾依士既CO2竟然冇氣出,仲有水倒流,幸好有個止流閥,否則支CO2真係可以講再見

今日整左支啫喱版CO2,不過唔知係咪我太執著水一定要個樽既3份2,搞到唔係咁溶得晒+超多雜質,下次真係要溝淡D/用隔渣網先得
之後......仲出埋教學......"
不過今次出氣出得幾快,個幾鐘就有氣出,D氣出得好幼,數量還可以接受
最衰冇計泡,如果唔係就可以知幾秒1泡~~
可能係我落多左小小乾依士+落小左水吧,暖水只落左約3份1再多小小,加上超濃縮既溶液(真係好想講句超濃縮洗衣粉)
由於冇生得高既植物阻擋既關係,擴散得幾好,冇氣積住係同一個位
D氣勁到連樽內都有:victory:


DIY CO2教學 (啫喱版) : http://www.agames.com.hk/viewthread.php?tid=25525&extra=page%3D1

最後講樣最震撼既野比各位聽
就係原來ADA既無縫缸賣成2萬幾!!!夠震撼了吧?
呢個價錢,足以夠各位開成幾個缸(淡水),同2個左右既鹹水缸
因為就算買其他牌子既水晶缸/訂缸/普通玻璃缸,通常都唔會去到2萬幾咁貴!!
依個價我都係今日上某討論區睇返黎的,唔知現在既價又係幾多呢?
不過ADA缸既玻璃靚過其他缸係真既,值唔值得就自己衡量啦

最最後祝各位兒童節快樂~~

[ 本帖最後由 lamxdxd 於 2009-4-5 01:07 編輯 ]

lamxdxd

今次支CO2出氣量幾勁,全晚都只有1隻蝦仔死亡,但啫喱都好似唔見左成吋幾2吋
今日開燈時見到有隻櫻桃蝦好似有卵..唔知係我睇錯野定真係有呢...?
講開又講,自上次DAY 7果粒BACTER BALL後,都好耐冇餵食了,只有大缸先繼續1星期餵1次
相信大家都想話我冷血,謀殺蝦仔之類既說話,
不過都要了解蝦仔既食性係乜,食乜維生...蝦仔係雜食性,水草,藻類,苔,泥中既礦物質,有機菠菜,死魚都食
個蝦缸係泥底,又有莫絲,鹿角苔,加上耐唔耐有蝦脫殼,所以係可以0餵食,不過如果太驚餓死既都可以1星期落5粒以下既糧...
但大缸既蝦係用隔離網養,網中冇泥,得條蜈蚣草,所以0餵食係唔可行,要1星期放幾粒蝦糧

目前既日常維護都係......
大缸: 唔換水,只加返蒸發左既水
每日開燈4 - 8小時
CO2長開
魚日日餵,蝦1星期餵1次

缸仔: 隔2日至1星期換3份1水
每日開燈2 - 4小時,間中會分段照
CO2暫定長開
繼續0餵食
========================================================
夏天將至,其實我最驚既係2缸蝦仔會因水溫太熱而熱死...
特別係缸仔,冇乜風入到去,加上依加D水都好暖,而大缸果D同水喉水既溫度冇分別,
但大缸都係2支8W T5,缸仔先至1支5W PL...有乜理由1支燈D水都可以熱咁多...?唔通係燈同水面既距離影響到?
既然係咁..不如換成1尺 / 10吋缸,再換過支燈...?反正個底座都冇乜用,要黎都晒位
睇黎2個缸都要買風扇,水冷未必買,千幾蚊一部,冇咁富貴

[ 本帖最後由 lamxdxd 於 2009-4-5 17:46 編輯 ]

lamxdxd

自從加左CO2後,雖然出氣量頗多,但死蝦數目有上升既情況
睇黎下次整都要減小一下乾依士既份量..
其實琴晚訓教前都已經將個蓋拎開,第2日起身睇都唔見有乜事
但今日返到黎睇,蝦仔既死狀令我O咀,1隻係琴晚死,應該係太多CO2,頂唔順
2隻係今日死,其中1隻比掛濾個入水位吸住,唔通真係要包棉...?

另外今日睇返,其實D水都已經清好多,不過唔夠光係真既,搞到草又唔靚,水又唔正,真係要換燈!

除左死蝦,蝦缸仲驚見白線蟲!!你冇睇錯,的確係白線蟲,唔係白點蟲!
點解我會睇到?因為我果陣撈緊水面D草,撈完又抹玻璃,見到有條白色接近透明既物體係水度飄下飄下!!
雖然對蝦係冇害,但飄下飄下真係好影響外觀+心情,所以點都要撈走佢!
幸好冇買微生物之素,如果唔係我諗D蟲仲多...=0=
不過我都唔係第1次見,之前大缸撈草果陣都撈到條,仲大條過今次依條,
今次依條都係半節手指長,但大缸果條成1節手指咁長(係我隻手指既1節,別誤會)

相信大家都想問點解我今日12點就上,今日統測,放11點幾,測英文+科學
英文可以話幾易做,但頭果篇閱讀理解真係冇心機睇
相反...科學我真係做到講粗口,多野寫之餘又得半個鐘做,搞到最尾既長答接近半頁冇做~
份卷都仲可以話幾容易,問酸鹼果幾條問題都唔係咁難到我...
============================================================================
話說琴晚係某水族討論版見到一個自制缸背過濾(假滴漏)既POST,
用左唔係好多錢就已經整到個過濾槽..用亞加力膠整...
不過小妹不才,睇極都唔係咁明到底抽水入過濾槽係用潛水摩打定係抽水摩打..
而抽左水後入第1格,又係咪插條喉入去白棉度,然後乜喉都唔洗就得呢?
如果睇明左既話,真係考慮整返個玩下先,但最大問題係玻璃膠係咪用普通用開既就得呢?玻璃同亞加力膠邊樣好,冇咁易爆?
但如果真係要整,都要係翻缸時整,如果唔係既話有排搞...
其實我諗緊,如果個過濾槽上面加個蓋(可隨時拎起既),入水位用硬喉(好似叫雨淋管),
出水位係個過濾槽鑽個洞,再插一小段硬喉,之後駁濾桶用開果D粗喉,再駁返硬喉~出水位用鴨咀,
整到好似濾桶咁又得唔得呢=-=?因為大缸隔離左右冇咁多位=-=
============================================================================同場加映幾張蝦照

沉睡的紅蝦公主+王子的親吻,型嗎?                               呢隻好鐘意係條喉度周圍走


2日已經可以冇左咁多啫喱,可想而知落太多乾依士既後果係幾咁恐怖


全景,如果再光D+水清D+草插得靚D+相機正D就好


[ 本帖最後由 lamxdxd 於 2009-4-6 13:19 編輯 ]

lamxdxd

頭好暈,只能以一句去講: NO2同NO3都爆缸中......

lamxdxd

呢幾日細缸瘋狂死蝦,完全唔知乜事
NO2同NO3都爆缸中,但係水就清晒...
不過見到有蟲係玻璃度,睇過資料,係冇害既

今日死左成2隻,撈走死屍後即換水,睇黎會繼續死蝦,直至翻缸時...

唔通用蝦仔開缸真係開唔到?定係今次完全冇硝化菌係水中?
定係隻泥根本唔掂?睇黎暑假真係要翻缸...

lamxdxd

無奈...估唔到棵水羅蘭真係生得超快
快到連撈死屍都有d困難,話說今日先至發覺三線公條屍卡住係度
要撈真係唔容易,搞左幾分鐘,終於成功撈起

死蝦情況...可以話唔係咁隱定,但好肯定缸仔已經死到剩低約4隻蝦
現在每3-4日換3份1水...硝化細菌要慳d落,得返好小
支燈...真係報得銷,閃下閃下,真係唔開燈好過!

[ 本帖最後由 lamxdxd 於 2009-4-14 14:27 編輯 ]

lamxdxd

蝦缸愈黎愈多蟲,真係捉都懶得捉...個細化杯愈積愈多果D唔知蝦屎定乜野=0=
啡色的...個缸又咁多蟲,真係唔知用咩清...

蝦仔一係就唔死,一死就2隻以上,今日大缸死左1隻蝦,細缸死左2隻...唉......
點底乜原因令到缸仔死咁多蝦呢??

大缸D草愈生愈恐怖,青苔又多左..懶得理啦,都係暑假翻缸啦...反正D泥都唔會用得好耐