封測就黎完,大家覺得隻GAME點?10分滿分

ryusjoke

我本人就玩左大約四粒鐘。講真係有D失望既，最主要原因係D劇情實在太膠(宜家就唔劇透啦),而且劇情與劇情之間連接鋪排得好差,認真睇故事都完全代入唔到隻GAME, 最衰既係動畫無得CUT, 逼我硬食哂D垃圾劇情。但當然啦,我唔排除之後既故事可能好引人入勝,因為我都淨係玩到三十級左右.但呢四粒鐘我睇既劇情都非常之悶,故事背景同玩既內容無乜關聯,比如話Boss既登場求其,背景資料亦無乜交代,,場景既轉換亦都好差,亦都無交代點解呢個場景地圖入面會有果一種怪物.整體故事背景同世界設定模糊.


第二,難度調較失衡.唔知係唔係封測特別簡單,或者D藍裝,橙裝特別易跌.我玩左四個鐘一啲挑戰性都無, 細怪打幾下就死, 打BOSS如果你唔係聖職,平均大約飲3-8支血水就搞掂(我當你完全唔走位,直接企系度劈佢),如果走埋位根本唔會扣血咁濟。任務類型亦都非常單調,九成都係打細怪(殺特定數量怪物 / 打怪收集物品),比人一種不斷重複做同一樣野既感覺.


第三,角色外觀同技能數量.角色外觀除左把武器同時裝會變之外,其他簡直完全無分別.比人一種就算換左武器 / 轉左職都無乜點變既FEEL.而且感覺唔到自己變勁到.成功感低到一個點.技能數量亦都唔多,而佢亦都限死你一次淨係可以裝六個技能,技能搭配非常少,接技亦都好公式化,甚至接同唔接無乜太大分別.


但呢隻GAME都有好處既, 就係佢畫面唔算差,睇落幾順眼,人物走路同轉向既動作好順,打怪避招非常方便
技能硬直時間亦都好短,遠程施法時間大約在0.1秒左右,近戰既打擊感亦都唔錯.
音樂方面,不得不讚Alta既粵語配音好用心機,雖然完全幫唔到玩家代入,但好有親切感,尤其是當背包滿左,或者隻怪跌靚裝果陣佢既提示聲都好得意.雖然戰鬥果陣既BGM有D煩而且唔夠緊張 / 熱血.但系城鎮遊逛時候既BGM算係順耳.


總括而言呢隻GAME 我比 4分. 以傳奇網絡呢幾年既遊戲品質黎講算係咁,但撐唔撐到三個月都成問題
好啦,寫住咁多先,唔知大家同唔同意?或者大家另有意見?歡迎大家留言一齊討論. 發表意見, 如果覺得我既意見一派胡言或者文不符實既話 儘管大大聲插我啦!

ryusjoke

視角方面 反而我睇耐左都接受到(可能係因為我玩其他GAME都好少轉視角啦)

呢種視角既好處係方便遊戲公司製作走路/技能動畫,所以玩家操控角色行路果陣個動作好順,人物轉向亦都睇唔出有硬直或不協調,呢一方面以一隻2.5D GAME黎講係值得一讚.
不過值唔值得捨棄 自由控制視角 黎換取呢D咁雞毛蒜皮既細節改良就見仁見智啦。